【劉皓視角】是咁的（潮文（？）

巴打你地著番條褲先，真係無野俾你地丁

是咁的，我上司佢其實曾經係我偶像，可惜都係個句，沒有距離就沒有崇拜，自從同佢一齊做野，朝見口晚見臉後，我對佢嘅印象，由：

男神！霸氣！神人！超勁！斗神！好型！瀟灑！英俊！真漢子！求簽名！（以下省略）

變成兩個詞語：

1)博打

2)毒撚

以前嘅我到底點解會覺得一個下巴好似白蘿蔔咁生晒鬚根 黑眼圈大過廚房隻鑊 ，仲有截肚腩仔響度耀武揚威，無車無樓，基本上都無咩專長，淨係識打機煲煙嘅呀叔...好啦，未到呀叔嘅咁又，但真心到底邊度型？

成日係辦公地食煙，仲要食到似黃大仙食香咁款，全日24小時除左瞓覺個陣，基本上無停過，長期有枝煙好穩而位置無變咁叼響度，我曾幾何時懷疑其實係咪牙黎

Anyway，我對佢食煙其實無咩意見，煙民何其多，落OK門口走轉都有五六七個系你左近，但係D二手煙搞到辦公地方成個火警現場咁我就真係...咳咳...

但靚女都會屙屎，偶像又有咩可能無缺點呢？

但有次真係......我已經，對現實放棄憧憬了

個時做埋手頭上ｄ野，搞下搞下都就快過晚市時間，諗住偷同事ｄ餅食下之後番去宿舍瞓，點知除低Headphone個下：

「肚餓唔肚餓？出唔出去食？」

個腦即刻hang機藍屏重新開機，我已經唔記得自己講左ｄ咩，好似仲傻笑左出聲，總之應承左，緊係啦，男神上司喎，[舌累]飯應啦唔該

之後佢行我前一步左右帶路，一直行一直行，經過好多間餐廳，我一路行一路諗佢諗住去邊間，心入面直頭想摷本簿出黎紀低佢

無停系翠華

亦無停系M記

更無停系大家樂吉野家KFC大快活茶魚飯後太興美心譚仔......

最後停左係星巴克.....我心諗：空肚飲咖啡咁開心？

點知佢拎轉頭問我：

「行左咁耐，你到底食咩啊?」

……...…………

你行左咁Hi耐，由街頭行到去街尾，而家先講原來係等我發板？You have why play me？

算

回想一下啱啱沿途個D食肆，好聲好氣咁開口問佢：「呃...咁....美心？」

結果佢好愕然咁望番轉頭，我即刻想跪低道歉，我竟然講出黎D咁向左走向右走嘅幼稚答案，就算你摑十四巴十八巴二十巴都係好正常，係，我錯，對唔住，我對唔住我老豆老母，我對唔住呢個世界，我簡直唔應該俾人生出黎，根本就污染空氣浪費資源，仲佔用你嘅腦容量去記住我這種想燒無掟燒，想埋無掟埋嘅垃圾之中嘅垃圾

深呼吸

佢係上司，係招財貓，係偶像，係0.5個男神

聰明嘅我決定系心入面諗好晒對方嘅反應先再出聲：

大家樂　３９蚊喎一個咖喱牛腩飯都

KFC　又油又凍

譚仔　你食辣架咩？

太興　好遠囉，由街尾行番去街頭

大掛檔　男人的浪漫，豆腐火腩飯？你自已慢慢享受啦吓

太興　中午先食完叉雞飯咋喎？又食燒味？

M記　你唔係諗住我會陪你捱M記下化？

翠華　咁不如番Canteen算啦咁

一瞬間思考完畢就決定係你喇！出黎啦吉野家！

「咁不如去吉野家打邊爐？反正凍凍地」

佢Keep住我講美心個陣望住我個個神情，然後眨左幾下眼，掟低句「哈？啊，嗯，好啊，行啦咁」之後繼續行

……..…………

.………………..其實點解ｄ經歷咁眼熟？係除左個性別唔多啱以外。

去到吉吉家，我有我嘅生活， 佢有佢嘅忙碌，我地完全就好似搭檯咁，佢有佢嘅狼吞虎嚥，我有我嘅食不知味，勁驚會唔小心FING到ｄ湯汁去對面，我敢肯定個餐一定係我咁大個仔以黎，食得最斯文嘅一餐

當我食到第三塊肥牛，我覺得咁樣真係唔Work

同男神食飯，一句野都無傾過，你仲好意思叫自己做粉絲？學下班妹妹仔啦！最起碼簽名都應該爭取番個啦！galgame玩過咁多，求其搵一兩句出黎啦死仔！

我決定食曬果幾條金菇菜就去馬，於是我一邊組織言論，一邊慢條斯理咁嚼緊條菜，然後：

「其實我有野想同你講」

…………..差ｄ哽死。

當我計完同性婚姻合法化個幾個國家機票錢食宿開銷登記等等嘅費用，男神佢終於吞左佢舊芝士魚蛋，佢又繼續講：

「其實你閱讀比賽嘅能力唔差，但你成日都將ｄ精力放系ｄ不必要嘅地方，專注ｄ得唔得？」

我真係好開心好幸福呀暗戀你！

我ｄ表情俾你浪費晒啦！

之後佢繼續講講講講，但心灰意冷嘅我，已經無聽入耳，我而家都已經唔記得左佢又講過ｄ咩

現實如此殘酷，殘酷過殘酷遊戲，對你怎麼好，亦無所圖，同情分多少，都也得到，但我而家既唔自由自在但又永遠受氣，埋頭事業都無法令大家都好過

之後好單純咁當佢上司同事咁相處左陣，發現佢對人際關係的處理實在令我感到極危險，我對佢實在無曬崇拜，於是我房入面ｄ周邊 Poster呀 應援扇呀 毛巾呀 完全無樣出過嘅寫真呀畫冊呀，要錢唔要貨咁全部放曬出去，最開心係勾搭到幾個妹妹仔，可惜今年依舊lonely christmas

而已有件勁想賣出去嘅，偏偏仲要日日著住，咪我件隊服囉，內襯仲有佢金簽TIM

唉

之後嘅都不要再說了，總之人事調動，佢走左之後又黎左個新上司，神童天才個種你明架啦

但原來呢個世界真係有人類係聽唔明人話，完全無法溝通，堅係危險

Lunch趕頭趕命咁食完，即刻周圍刮佢，終於俾我響Canteen搵到，坐佢對面，好認真咁問佢有咩對策方法戰略打法佈署關於呢場生死攸關十分重要嘅比賽賽事戰鬥

......我驚佢唔明，特登俾多幾個關鍵字，唔洗多謝

「吓？咪我衝最前，你地跟住，我打中間，然後你地包揼分組睇下打右邊定左邊啦，唉，咁都仲要問」

……….

我比較想打右臉，你可唔可以伸一伸過黎，thank you for your cooperation

深呼吸

哭泣聲絕無意義，而世界多美好，我地唔可以排斥其他物種融入人類社會，要有好客之道，全地球是一體的，無分彼此，情同手足，Fu_k your mother, cheese hamburger

「咁......呃......但係......」

「不要問，只要信！」

講呢啲？！

信你一成，耶穌顯靈！

如果我要信你條HIHI，咁我不如即日去受洗做條耶撚算啦！

可惜我演技太高深，佢完全感受唔到我嘅憤怒

佢掟低一句信我者得永生後就走左，但佢個餐盤仲留左響度，我望住個幾舊張牙舞爪爭妍鬥麗嘅西蘭花，我默默咁思索現今教育，是咪真係出左問題？鋤禾日當午 汗滴禾下土　誰知盤中飧 粒粒皆辛苦，所以我好默默咁叉左佢地黎食

啱啱放到口唇邊，條HIHI又兜番轉頭，然後被人非禮咁款響度尖叫，但我已經連反應都懶得俾佢

最佳女主角，你要就攞去啦，一路好走

唉

人總需要勇敢生存，我還是重新許願

唉

其實我上世係咪做錯左D咩，點解我遇親嘅都係ｄ神一般嘅奇葩，最慘嘅係佢地又真係太接近神，我等凡人只好......

「唐隊我地下場......」

「吓？咪我衝最前，你地跟住，我打中間，然後你地包揼分組睇下打右邊定左邊啦，唉，咁都仲要問」

點解咁熟口熟臉架呢呵？

如果可以恨你 全力痛恨你 連遇上亦要躲避

無非想放下你　還是掛念你　誰又會及我傷悲　

前事最怕有人提起　就算怎麼伸盡手臂　我們亦有一些距離

…

………何止有一些距離，簡直係成個次元啦好嘛？

我地已經唔係同一個世界同一個物種，個腦更加唔係同一頻道同一個型號，正所謂：硬件唔相容，底板聽燒燶；要同你溝通，GOOGLE都無用

但人唔作出犧牲，就唔會得到有任何嘅收獲

突然就諗起呢句

我..............

「隊長下場真係......？」

「不要問，只要信！」

屌！講呢啲！